Mevlid/ Süleyman Çelebi

Allâh adın zikr edelim evvelâ
Vâcib oldur cümle işde her kula

Allah adın her kim ol evvel ana’
Her işi âsân eder Allah ana

Allâh adı olsa her isin önü
Hergiz ebter olmaya ânın sonu

Her nefesde Allâh adın de müdâm
Allah adıyla olur her iş tamâm

Bir kez Allâh dese aşk ile lisân
Dökülür cümle günâh misl-i hazân

İsm-i pâkin pâk olur zikr eyleyen
Her murâda erişir Allâh diyen

Aşk ile gel imdi Allâh dîyelim
Derd ile göz yaş ile âh edelim

Ola kim rahmet kıla ol pâdişâh
Ol Kerîm ü ol Rahîm ü ol ilâh

Birdir ol birliğine şek yokdurur
Gerçi yanlış söyleyenler çokdurur

Cümle Alem iken Ol var idi
Yaradılmışdan Ganî Cebbâr idi

Var iken Ol yôğ idi ins ü melek
Arş u ferş ü ây u gün hem nüh-felek

Sun’ile bunları Ol vâr eyledî
Birliğine cümle ikrâr eyledi

Kudretin ızhâr idüp hem Ol Celîl
Birliğine bunları kıldı delîl

Ol dedi bir kerre var oldû cihân
Olma derse mahv olur ol dem hemân

Bâri ne hâcet kılavuz sözü çok
Birdir Allâh ondan artık tanrı yok

Haşre dek ger denilirse bû kelâm
Nice haşr ola bu olmaya tamâm

Pes Muhammed’dir bu varlığa sebeb
Sıdk ile ânın rızâsın kıl taleb

Ger dilersiz bûlasız oddan necât
Aşk ile derd ile edin es-Salât

Ey azîzler işte başlarız söze
Bir vasiyyet kılarız illâ size

Ol vasıyyet kim derim her kim tuta
Misk gibi kokusu canlarda tüte

Hak teâlâ rahmet eyleye anâ
Kim benî ol bir duâ ile anâ

Her ki diler bu duâda bûluna
Fâtiha ihsân ede ben kûluna

Süleyman Çelebi

İrfanDunyamiz.com

En güzel şiirleri okumak için tıklayın.

Tavsiye kitap listemize ulaşmak için tıklayın.